Щынагъо дэдэ зэхъокӀыныгъэхэр дунаим щэхъух, ахэмэ къэкӀощт уахътэм дунаим тхьамыкӀэгъошхохэр къыфахьыщтых, ахэр чӀыопс тхьамыкӀагъохэп, цӀыфхэм зыфахьыжьыщт тхьамыкӀагъох.
Ӏофыр тымыгъэхьазырэу тиусэцӀэ къызэӀутхыным тыфежьэн: США-р, Дональд Трамп зипэщыр, шъхьэихыгъэу еӀо Гренландиер къаштэщт, Панама къаштэщт, Канадэр къаштэщт. Дунаим ихэгъэгухэм щынагъо афешӀы экономикэм, зэдэщэн-зэдэщэфыным яӀофкӀэ адрэ хэгъэгухэр къыфэмыдэӀухэмэ, США-м заор къыригъэжьэн ылъэкӀыщтэу. Аужырэ щынагъор Трамп къыригъэжьагъ, ядернэ ӀофымкӀэ Иран къыфэмыдэӀумэ, ащыгъум сентябрэ мазэм Иран дунаим икартэ тетыжьыщтэп ыӀуи.
Урысыер Украинэм зыкӀебэнагъэм лъапсэу иӀэр щымыӀэу, Урысыем иполитик пстэуми, Путиныр япащэу, Украинэр къашӀэрэп ары ныӀэп. Непэ къызнэсыгъэм Украинэм щыщ нэбгырэ минишъэ пчъагъэ а ебэныгъэм хэкӀодагъ, миллион пчъагъэ хэгъэгум икӀыгъ. ИкӀи миллион пчъагъэ Украинэм идэжьхэр къыщагъэнагъэх. Урысыем иофициальнэ ТВ пропагандэу къытырэм уеплъмэ, занкӀэу къаӀо Украинэр ядернэ ӀашэкӀэ гъэлыгъэн фаеу. Ары ныӀэп, Европэм икъалэ пстэури гъэлыгъэн фаеу къаӀо.
Израилыр расист къэралыгъоу бэшӀагъэ, цӀыф миллиони 5-м ехъу (палестинхэр) а къэралыгъом хьапс ышӀыгъагъэх, фитыныгъэу яӀагъэр щыӀагъэп, гражданскэ фитыныгъи, политическэ фитыныгъи. Непэ, ыкӀи фашист хьазыр зыхэлъ Хьамас зыфиӀорэ движением чъэпыогъум и 7-м Израилым зыкъызеуалӀэм ыуж, Газэ ыгъэкъэбзэнэу ригъэжьагъ. Джырэ къызнэсыгъэм цӀыф мин 50-м ехъу ыукӀыгъ, ахэм анахьыбэр Ӏашэнчъэу щыт цӀыфхэр, бзылъфыгъэхэр, сабыйхэр арых.
Израиль Сирием бомбэ ридзэу ригъэжьагъ, ау Сирием ихабзэшӀэ къэралыгъо пащэхэм къаӀуагъ ыкӀи нафэу къагъэлъэгъуагъ зы хэгъэгуи фронт къыдызэӀуахын гухэлъи, шӀоигъоныгъи зэрямыӀэр. Ау Израиль иполитикхэм ашӀошӀы Сирием щыпсэухэрэр тапэкӀэ нахь лъэш хъунхэу, етӀанэ къытебанэнхэу мэхъу, арышъ, ахэр Ӏухыгъэнхэ фаеу. Ар нацистхэм «Джы къэхъугъэ сабыир аукӀын фае тапэкӀэ къыттебанэу мэхъу» зыфаӀуагъэм фэд.
Дунаир зыкъеӀэтыгъэным фэкӀо, зэхъокӀыныгъэшхохэр къэмыхъухэмэ, ящэнэрэ дунэе заор къызэрежьэщтым шэч хэлъэп, ащ ядернэ Ӏашэхэри щагъэфедэщтых.
Европэ Союзым, Китай, Индием, Пакистан атом къэралыгъохэу зэрэщытхэм зэдэлэжьэнхэ фаеу псынкӀэу щыт, ахэм язэдэлэжьэныгъэкӀэ ыпшъэкӀэ зигугъу къэтшӀыгъэ къэралыгъоищым ябгырыкӀыныгъэ къагъэуцун алъэкӀыщт.
Comments
Post a Comment