Адыгэ Республикэр илъэси 100 зэрэхъугъэм тефэу, Адыгэ хэку комитетым иапэрэ секретарыгъэу, Черкес (Адыгэ) автоном хэкум иуцун зиIахьышхо хэзышIыхьэгъэ Хьахъурэтэ Шыхьанчэрые, шэкIогъум и 15-м, Мыекъуапэ саугъэт къыщыфызэIуахыгъ. Черкес (Адыгэ) автоном хэкум иапэрэ пащэ исаугъэтэу джэрзым хэшIыкIыгъэр, метри 3,2-рэ зилъэгагъэр Мыекъуапэ иавтобус уцупIэ иIупэ щагъэуцугъ,- джащ фэдэу Адыгэ Республикэм и ЛIышъхьэ ипресс-къулыкъу къетхы.
КъызэIухыным къекIолIагъэхэм зафигъазэзэ Адыгэ Республикэм и ЛIышъхьэу КъумпIыл Мурат зэрэхигъэунэфыкIыгъэмкIэ, Хьахъурэтэ Шыхьанчэрые Адыгэ автоном хэкум иуцуни, хэхъоныгъэ егъэшIыгъэными иIахьышхо ахишIыхьагъ.
«АкъылышIоу, пэщэ дэгъоу щытыгъэ, пшъэдэкIыжьышхо зэрихьырэр къызыгурыIощтыгъэ Хьахъурэтэ Шыхьанчэрые Адыгейми Пшызэ шъолъыри лъэшэу ащалъытэ. Ар сыдигъуи Iофэу ыгъэцакIэрэм фэшъыпкъагъ. Анахь шъхьаIэр — Адыгеимрэ ащ исхэмрэ шIу зэрилъэгъущтыгъэхэр, щыIэныгъэу хэкум илъыр нахьышIу хъунымкIэ фэлъэкIыщтыр зэкIэ зэришIэщтыгъэр ары», — къыIуагъ КъумпIыл Мурат.
Хьахъурэтэ Шыхьанчэрые 1883-рэ илъэсым къуаджэу Хьащтыку къыщыхъугъ. 1922-рэ илъэсым Адыгэ автоном хэкоу зэхащагъэм ихэку исполком иапэрэ тхьаматэу хадзыгъ. 1932-рэ илъэсым къыщегъэжьагъэу 1935-м нэс ВКП(б)-м и Адыгэ хэку комитет иапэрэ секретарэу щытыгъ.
Хьахъурэтэ Шыхьанчэрые 1935-м идунай ыхъожьыгъ. 1967-рэ илъэсым къуаджэу Афыпсыпэ исаугъэт щагъэуцугъ. Нэужым Мыекъуапэрэ Краснодаррэ яурамхэм ащ ыцIэ афаусыгъ.
Comments
Post a Comment