Мыекъопэ къэлэ хатэм дышъэпс егъэшъогъэ мыIэрысэ дагъэуцуагъ. Ащ итеплъэ Адыгэ Республикэм и ЛIышъхьэу КъумпIыл Мурат чылагъо хъытыум нэкIубгъоу щыриIэм къыщигъэлъэгъуагъ.
ЛIышъхьэм цIыфхэм агу къыгъэкIыжьыгъ «Мыекъуапэ» «мыем икъуап» къызэрикIырэр, ащ фэдэ мэхьанэ зэриIэр. Джары мыщ щагъэуцущт пкъыгъом егупшысэхэ зэхъум мыIэрысэм итеплъэ къызкIыхахыгъэр. Адыгэ Республикэм хэхъоныгъэ егъэшIыгъэным фэгъэхьыгъэ программэм къыдыхалъытэгъэ зыгъэпсэфыпIэ чIыпIэу къыхахыгъэм игупчэу ар хъугъэ.
КъэIогъэн фае, гъэрекIо щегъэжьагъэу агъэцэкIэрэ проектым елъытыгъэу псыхъоу Шъхьэгуащэ инэпкъэу къэлэ хатэм къыхиубытэрэм игъэцэкIэжьынкIэ Iофышхо зэрашIэрэр. Непэрэ мафэм ехъулIэу километри 2,5-рэ хъурэ нэпкъыр агъэпытагъ, дахэу ашIыгъ, лъэсрыкIо гъогукIэхэр ащашIыгъэх, джэгупIэ чIыпIэхэр къыщызэIуахыгъэх, чэщым остыгъэхэр къыщынэфэу ашIыгъ.
Comments
Post a Comment