Адыгэ Республикэм и ЛIышъхьэу КъумпIыл Мурат Къэрэщэе-Щэрджэс Республикэм и ЛIышъхьэу Темрезов Рашид, Къэрэщэе-Щэрджэсым ипэщэ IэнатIэм джыри зэ зэрэхрадзыжьыгъэм фэгъэхьыгъэ мэфэкI Iофтхьабзэу рекIокIыгъэм хэлэжьагъ. Ащ фэдэу Адыгэ Республикэм и ЛIышъхьэ ипресс-къулыкъу къеты.
Къэрэщэе-Щэрджэс Республикэм и Лъэпкъ ЗэIукIэ (Парламент) изичэзыу зэхэсыгъо идепутатхэм Урысые Федерацием и Президент нэмыкIхэм ягъусэу къахилъхьэгъэ кандидатурэм зыкIыныгъэ ахэлъэу амакъэ фатыгъ.
А Iофтхьабзэр Черкесск, республикэм и ЛIышъхьэ иадминистрацие зычIэт унэм щыкIуагъ. Ащ хэлэжьагъ Адыгэ Республикэм и ЛIышъхьэу КъумпIыл Мурат.
«Iоф зыщыпшIэгъэ илъэсхэм къакIоцI узипэщэ купым бэ зэшIуихыгъэр республикэм щыIэкIэшIу илъыным пае. Экономикэр нахь пытэ хъугъэ, хэхъоныгъэм иамалыкIэхэр нахь къэнэфагъэх, зекIоным нахь псынкIэу хэхъоныгъэ ышIыгъ. къыIуагъ КъумпIыл Мурат.
Адыгэ Республикэм и ЛIышъхьэ къызэрэхигъэщыгъэмкIэ, Адыгеим исхэм Къэрэщэе-Щэрджэсым игъэхъагъэхэм лъытэныгъэшхо афашIы ыкIи къош лъэпкъым къыдэхъурэм агу къадеIэу кIэгушIух. КъумпIыл Мурат къызэриIуагъэмкIэ, республикитIур бэшIагъэ зызэдэлажьэрэр, зэфыщытыкIэшIухэр азыфагу зилъхэр. Ахэр илъэс къэс нахь мэпытэх, ежь ышъхьэкIэ Рашид Темрезовми иIахьышхо ащ хэлъ.
Къэбэртэе-Бэлъкъарым и ЛIышъхьэу КIокIо Казбек, Ставрополь краим и Губернаторэу Владимир Владимировыр джащ фэдэу республикэм ипащэ къыфэлъэIуагъэх гъэхъэгъакIэхэр ышIынхэу.
Темрезов Рашид Iофтхьабзэм хэлэжьэгъэ пстэуми зэрафэразэр къыхигъэщыгъ ыкIи хэхъоныгъэм тегъэпсыхьагъэу Къэрэщэе-Щэрджэсыр ыпэкIэ зэрэлъыкIотэщтымкIэ къыгъэгугъагъэх.
Comments
Post a Comment